"जनसेवा हीच खरी श्रीमंती" श्रीमंत सेवा प्रतिष्ठान ही एक सेवाभावी संस्था असून, तिची स्थापना PMPML (पुणे महानगर परिवहन महामंडळ लि.) मधील समविचारी कामगारांच्या पुढाकारातून २०१३ मध्ये झाली. दैनंदिन कर्तव्यासोबत सामाजिक जाण ठेवून, गरजूंच्या मदतीसाठी काही तरी सकारात्मक आणि कायमस्वरूपी योगदान द्यावे या उद्देशाने ही संस्था उभी राहिली. PMPML मधील कर्मचारी हे शहराचा गतीशील भाग आहेत. हेच कर्मचारी आपल्या सेवावृत्तीपलीकडे जाऊन समाजातील वंचित घटकांसाठी काहीतरी चांगले करावे या इच्छेने एकत्र आले आणि श्रीमंत सेवा प्रतिष्ठान या नावाने समाजसेवेची चळवळ सुरू केली. ही संस्था म्हणजे “कामगारांचा समाजासाठी दिलेला हातभार” आहे. “जनसेवा हीच ईश्वरसेवा” या विचाराने प्रेरित होऊन प्रतिष्ठानने सुरुवातीला अन्नदान, रक्तदान यासारखे लहान उपक्रम सुरू केले. प्रतिष्ठान सामाजिक, शैक्षणिक, वैद्यकीय, धार्मिक अशा विविध क्षेत्रांत मदत करत आहे.
"विठू माऊलीच्या सेवेत अन्नदान व भक्तांसोबत पंढरीचे दर्शन!"
श्रीमंत सेवा प्रतिष्ठान दरवर्षी आषाढी वारीच्या निमित्ताने वाखरी , पंढरपुर येथे खास उपक्रम राबवते. या दिवशी संस्थेच्या वतीने हजारो वारकऱ्यांना दिवसभर मोफत अन्नदान, पिण्याचे पाणी, यांची सेवा दिली जाते. याच दिवशी अन्नदान झाल्यानंतर संस्थेचे कार्यकर्ते पंढरपूर येथे विठ्ठल रुक्मिणी मंदिरात दर्शन घेतात.
"शिवसेवेची प्रेरणा – रक्षणासाठी रक्तदान!"
श्रीमंत सेवा प्रतिष्ठान दरवर्षी छत्रपती शिवाजी महाराज जयंती निमित्ताने, राष्ट्रसेवेसाठी अहोरात्र झटणाऱ्या भारत मातेच्या वीर जवानांसाठी रक्तदान शिबिराचे आयोजन करते.
शिवजयंतीच्या पावन दिवशी, वीर छत्रपतींच्या शौर्याला अभिवादन करताना, प्रतिष्ठानचा हा उपक्रम "कर्तव्यनिष्ठेचे रक्त, देशाच्या रक्षणासाठी" असा संदेश देतो.
"एक हात मदतीचा... उत्सव देव दिवाळीचा!" या संकल्पनेतून श्रीमंत सेवा प्रतिष्ठान दरवर्षी देव दिवाळीच्या निमित्ताने विविध सामाजिक उपक्रमांचे आयोजन करते. गरजू, अनाथ, मतिमंद आणि उपेक्षित घटकांना दिवाळीच्या आनंदात सहभागी करून घेणे हे या उपक्रमाचे मुख्य उद्दिष्ट असते.
पद्मश्री पुरस्कार प्राप्त कै. सिंधुताई सपकाळ यांच्या सासवड कुंभारवळण येथील ममता बाल सदन मधील जीवनावश्यक वस्तूंचे वाटप.
कु. युक्ता रिठे व कु. तनुजा रिंडे यांना सलग ११ वी व १२ वी शिक्षणास अर्थिक मदत.
कात्रज आगारातील गुणवंत कामगारांचा सत्कार.
शिवजन्मोत्सव सोहळ्या अंतर्गत ममता फाऊंडेशन या अनाथ विद्यार्थ्यांना धान्य वाटप तसेच सुमिती बालवन या संस्थेतील मुलांना खेळ साहित्य वाटप.
कात्रज आगारामधील भजनी मंडळास बबनराव महाडी यांचे स्मरणार्थ भजन साहित्य ( पखवाज, टाळ, मृदुंग, हार्मोनियम ) भेट.
कात्रज आगारामध्ये शिवजन्मोत्सव सोहळा निमित्त थंड पाण्याचा कुलर तसेच साई मंदिरास नगारा अर्पण.
